Biznesmeni kosovar, i akuzuar për vrasjen e këngëtares Emmy është dorëzuar vetë në polici, pasi ka përcjellë të dashurën e re në shtëpi. Aziz Kelmendin nuk e njihte policia dhe ai u ka treguar vetë se ishte personi që kishte aksidentuar këngëtaren, pavarësisht se nuk i kanë besuar, duke e akuzuar për vrasje. Faktet e reja kanë dalë në dritë dje, kur biznesmeni 47-vjeçar është paraqitur për masën e sigurisë në Gjykatën e Tiranës. Pavarësisht se ai ka ofruar garanci pasurore, togat e zeza nuk kanë pranuar lirimin e tij.
Gjatë vlerësimit të masës së sigurisë, biznesmeni i akuzuar për vrasjen e këngëtares Elsina Idershai, e njohur me emrin artistik Emmy, ka pretenduar se ngjarja ka qenë aksidentale. I pandehuri i ka treguar trupit gjykues, se ditën e ngjarjes, ai kishte shkuar në ambientet e lokal “Venue”, ku do të takohej edhe me këngëtaren Emmy, për t’i lënë një pako, që e kishte porosi. Sipas deklarimit të tij, në momentin që ai është takuar me këngëtaren, ka pasur në makinë edhe të dashurën e re. Sipas tij, Emmy i është afruar tek automjeti, ku ka nisur edhe të debatojë. Ndërkohë, biznesmeni 47-vjeçar ka pretenduar që për të evituar ndonjë konflikt të mundshëm, ka mbyllur xhamin dhe më pas është nisur për t’u larguar nga zona.
Duke vijuar me dëshminë e tij në gjykatë, Kelmendi ka argumentuar se këngëtarja ka qenë larg makinës, në momentin që ai është nisur dhe nuk e kishte vënë re që ajo ishte përplasur. Sipas tij, ai është larguar me automjetin e tij për të shpënë në banesë të dashurën e re, ndërsa më pas është kthyer sërish në vendngjarje, kur ka parë dhe ka kuptuar se çfarë kishte ndodhur. I pandehuri ka pretenduar para gjykatës se ai vetë u kishte thënë punonjësve të policisë, që ndodheshin në vendngjarje, se e kishte përplasur këngëtaren, por nuk e dinte më parë. Madje, para gjyqtares së gatshme, 47-vjeçari ka pretenduar se kishte konsumuar pije alkoolike përpara se të shkonte të takonte Emmy-n, por sipas tij edhe ajo kishte konsumuar shumë pije alkoolike.